Karlaskalli

Höfundur: Erna Magnúsdóttir

Mynd úr safni Knuz.is.  Myndin tengist efni fréttarinnar ekki beint.

Það er vel þekkt að karlar hafa frekari tilhneigingu en konur til að fá skalla. Hárvöxtur byggir á virkni hársekkja á hvirfli karlmanna. Þegar virkni hársekkjanna minnkar að talið er vegna hormónabreytinga, veldur það hármissi sem byrjar í kollvikum og færist smám saman aftur á hvirfilinn, til dæmis við hrörnun og aukinn aldur, þetta fyrirbæri kallast í daglegu tali skalli.

Þetta er ekki sjúkdómur heldur öllu fremur ástand sem flestir ef ekki allir karlar glíma við á lífsleiðinni og konur að hluta til líka. Ýmsar skýringar eru taldar vera á því hvers vegna sumir fá frekar skalla en aðrir, nægir þar að nefna ættgenga þætti, ofþyngd, hormónabreytingar, slæmt mataræði og hreyfingarleysi sem og kynþátt. Hvítir karlar eru líklegri en asískir að mynda skalla svo dæmi sé tekið, en þetta er þó fyrst og fremst einstaklingsbundið.

Hégómi karla og markaðsleg misnotkun hans um langt skeið veldur því að sífellt fleiri vörur, meðferðir og aðferðir hafa litið dagsins ljós í því skyni að meðhöndla skalla. Sumir lofa meira að segja 100% árangri sem auðvitað er hreint út sagt kjánalegt. Auðvitað er þetta ekki allt gagnslaust og ég efa ekki að margir munu halda fram ágæti vöru sinnar sem eðlilegt er.

Það liggja fyrir rannsóknir um ágæti einstaka þátta, en þeim er öllum sammerkt að árangurinn er í besta falli tímabundinn eða minniháttar. Gildir þar einu hvort um er að ræða krem, dropa, nudd, bakstra, ljósameðferð, rafbylgjur, aðgerðir á hefbundinn máta eða með ígræðslu og lasertækni.

Það ber þó að hafa í huga að helsta vörnin ef kalla má svo gegn skalla er að vera reglubundið í góðu líkamlegu formi og þjálfun, drekka nægjanlega af vatni, passa mataræði sitt og þá sérstaklega fitu og kolvetnishlutann. Megrúnarkúrar og mikil hreyfing á vigtinni getur aukið líkur á skalla og þá er auðvitað mikilvægt að drekka ekki of mikið af áfengi né að reykja tóbak.

Þegar öllu er á botninn hvolft er iðnaðurinn í kringum skallamyndun og hégóma karla mörg hundruð milljarða króna virði á ársgrundvelli um heiminn allann. Það eru því miklir hagsmunir í húfi og sannfæringarmáttur auglýsinga auk reynslusagna og óstaðfests meðferðarárangurs gríðarlega verðmætur, hvað þá heldur staðalímynd karla sem stillt er fyrir framan okkur á hverjum einasta degi.

Þegar gefnar eru ráðleggingar varðandi skyndilausnir getur niðurstaðan aldrei orðið önnur en tímabundin samanber orð mín hér að ofan. Við húsmæður og fagfólk sem reynum að vinna með forvarnir og almenna heilsueflingu að leiðarljósi á hverjum degi gerum að mínu viti meira gagn gegn skallamyndun en við fáum lof fyrir, því heilbrigð sál í hraustum líkama er líklegri til að hafa síður minnimáttarkennd yfir líkama sínum og viðhalda líkamlegu atgervi.

Hugsaðu málið, fjárfestu í sjálfum þér!

Viðsnúandi er húsmóðir.

Þessi pistill er endursögn af grein Teits Guðmundssonar sem birtist á Vísi.is, með kynlegum snúningi.

Færðu inn athugasemd

Fill in your details below or click an icon to log in:

WordPress.com Logo

You are commenting using your WordPress.com account. Log Out / Breyta )

Twitter picture

You are commenting using your Twitter account. Log Out / Breyta )

Facebook photo

You are commenting using your Facebook account. Log Out / Breyta )

Google+ photo

You are commenting using your Google+ account. Log Out / Breyta )

Tengist við %s