Aumingja Jóhannes…

Í Frakklandi eru dæmi um únga karlmenn sem hafa svarað kalli Gunnars Braga Sveinssonar, einkum þeir sem þrá verndað og öruggt umhverfi til að geta tjáð sig um jafnrétti kynjanna. Sumir hafa farið AA-leiðina og taka einn dag í einu en eru ekki ánægðir með árangurinn eins og þessi társtokkna reynslusaga sýnir okkur:

Jóhannes segist sárlega svekktur eftir að hafa sleppt karlrembu í heilan dag. Hann heldur því fram að engin kona hafi óskað honum til hamingju með það né hvatt hann á nokkurn hátt. Við töluðum við Jóhannes.

Jóhannes er 32ja ára. Hann fylgist vel með breytingum í samfélaginu og gerir sér grein fyrir því að samfélagið einkennist af mikilli karlrembu. „Í gærmorgun, þegar ég vaknaði, ákvað ég að gera félagsfræðilega tilraun og draga eins mikið og mögulegt væri úr karlrembulegri hegðun“ sagði Jóhannes í samtali við fréttaritara Knúz.

Þegar Jóhannes mætti til vinnu, ákvað hann að sleppa sinni vanalegu „Hæ sæta“ kveðju til Júlíu, samstarfskonu sinnar. Þess í stað bauð hann henni bara góðan dag. „Hún svaraði mér bara með „Góðan daginn, Jóhannes“ og minntist ekki orði á breytinguna.

Síðar sama dag, hélt Jóhannes tilraun sinni áfram og nú í strætisvagni. „Ég reyndi ekki að ná augnasambandi við neinn, heldur las bara blaðið mitt í rólegheitum úti í horni.“ Þarna sýndu konur ekki heldur nein viðbrögð eða gáfu nokkuð út á hegðun hans. „Ég er vanur að blikka til kvenna á kaffihúsinu mínu, en þennan dag fékk ég mér bara kaffi og íhugaði eigin stöðu.“ Enn og aftur, engar hamingjuóskir frá kvengestum kaffihússins.

Jóhannes segir að þessi tilraun sé gersamlega misheppnuð í hans augum. „Það kom ekkert jákvætt út úr þessu. Ég var næs, en græddi ekkert á því.“ Konur sem rætt var við eru efins. „Kemur lögreglan og óskar þér til hamingju þegar þú ferð eftir umferðarreglunum?“ Jóhannes situr þó fast við sinn keip. „Það minnsta sem þessar gellur geta gert þegar gaurar taka sig á, er að gera slíkt hið sama!“

Kristín Jónsdóttir þýddi lauslega upp úr þessum pistli: