24. desember í jóladagatalinu er … Gunnar Hrafn

Alnetið þarf knúz miklu oftar. Annars breytist það í vígvöll.
Gunnar Hrafn
Tildrögin að stofnun umræðuvettvangsins og vefritsins knuz.is má rekja til ótímabærs fráfalls Gunnars Hrafns Hrafnbjargarsonar á Eyrarsundi í byrjun ágúst 2011. Við ljúkum þessu aðventudagatali árið 2014 með því að minnast áhrifamikils og merks femínista. Gunnar Hrafn var doktor í málfræði og starfaði við háskólann í Lundi, þar sem hann bjó ásamt konu sinni og tveimur börnum. Mörg þeirra sem skrifa og hafa skrifað á Knúzvefinn þekktu Gunnar Hrafn persónulega, önnur þekktu hann aðeins af netinu.

Gunnar Hrafn var einkar afkastamikill í netskrifum og alveg frábærlega skemmtilegur og virkur FB-vinur. Það má segja að framar öðru hafi einkennt skrif hans (oft og tíðum) fremur svartur húmor – tja eða jafnvel aulahúmor – auk mjög sterkrar réttlætiskenndar. Baráttuviljinn, réttlætiskenndin og dirfskan sem voru meðal margra mannkosta Gunnars Hrafns fengu þegar fram liðu stundir útrás í alteregóinu Sigurbjörn, sem vinur vor bjó til þegar það gerðist sem kemur fyrir okkur flest, honum blöskraði allt bullið sem flæðir um netheima, hann fékk nóg og byrjaði að gagnrýna það sem honum þótti gagnrýnivert.

Þetta gerði hann á bloggsíðunni sinni Sigurbjörn – með æðiber í rassi. Sigurbjörn var óþreytandi við gagnrýnina, hann þráaðist við og þverskallaðist, sendi tölvubréf til einstaklinga og fyrirtækja, bloggaði í löngu máli þar sem hann gagnrýndi t.d. einhverja grein á afþreyingarmiðli lið fyrir lið o.s.frv. Það var sko ekki auðvelt að eiga við Sigurbjörn ef fólk var ósammála honum eða hafði að hans mati gert sig sekt um stórfelldan dómgreindarskort. Óþol fyrir hvers kyns vitleysu – einkum staðalímyndum kynjanna – einkenndi skrif Gunnars Hrafns á þessum vettvangi.

"Sigurbjörn femínisti"

„Sigurbjörn femínisti“

Þegar Sigurbjörn hafði haldið úti síðu sinni í hálft ár útskýrði hann í fáeinum orðum hvað hann væri að vilja upp á dekk. Hann sagðist t.d. vilja vekja athygli á furðulegri orðræðu í samtímanum – og því þegar konum og körlum væri holað niður á bása staðalímyndanna. Hann sagðist vilja gagnrýna konur og karla sem vildu endurreisa feðraveldið frá grunni – og hann ætlaði að benda á ofbeldið sem fólgið er í því feðraveldi. En fyrst og fremst sagði Sigurbjörn að bloggið hans snerist um að benda á kynjamisrétti og að hann vildi beita jákvæðri og uppbyggilegri umræðu til að bæta stöðuna.

Það segir kannski sitt um ástandið í jafnréttismálum að mjög margir áttu erfitt með að trúa því að karlmaður skrifaði undir nafni Sigurbjarnar. Hvaða karlmaður hefur svona mikinn áhuga á jafnrétti kynjanna? var jafnvel spurt með léttu fussi. Þess má geta að það var Gunnar Hrafn sem var einn aðalhvatamaðurinn að svonefndu Kiljubréfi, sem birt var í fjölmiðlum þegar Sigurbjörn og fleiri höfðu skrifast á við Egil Helgason og Sigrúnu Stefánsdóttur, vegna skakkra kynjahlutfalla í bókmenntaþáttunum Kiljunni í Ríkissjónvarpinu. Ekki skal fullyrt að Kiljubréfið hafi borið tilætlaðan árangur, en það vakti athygli og umræðu – og einmitt það var lagt upp með í byrjun.

"Knúzengill"

„Knúzengill“

Það var ástvinum, vinum, kunningjum og netvinum gríðarlegt áfall þegar Gunnar Hrafn lést við köfun aðeins 35 ára gamall, 4. ágúst 2011. Kannski er  klisjukennt að segja að „stórt skarð hafi verið höggvið í hópinn“ en það á fullkomlega við í þessu tilfelli. Það vantar eitthvað mikið í netheima þegar Gunnar Hrafn er horfinn. Því fæddist þessi hugmynd: Að skapa gagnrýninn vefmiðil sem gæti orðið vettvangur fólks – vina Gunnars Hrafns og skoðanasystkina hans – til þess að tjá sig um femínisma / jafnrétti / mannréttindi og allt sem því kynni að liggja á hjarta.

Eitt af síðustu kommentunum sem Gunnar Hrafn skrifaði í lífinu var þetta: „Alnetið þarf knúz miklu oftar. Annars breytist það í vígvöll.“ Í minningu vinar viljum við breiða út knúzið, sem hefur frá upphafi lagt sig fram um að vera í senn vinalegt og smáfyndið, en um leið grafalvarlegt andsvar við hverskyns óréttlæti og vitleysu.

Ein athugasemd við “24. desember í jóladagatalinu er … Gunnar Hrafn

  1. Hvernig var líf mitt eiginlega áður en Knuz varð til? Ómissandi hluti af daglegu lífi mínu, gagnlegt og gott. Til hamingju með ykkur og lífið.
    Femíniskt knús og þúsund þakkir.
    Ingunn

Færðu inn athugasemd

Skráðu umbeðnar upplýsingar að neðan eða smelltu á smámynd til að skrá þig inn:

WordPress.com Logo

You are commenting using your WordPress.com account. Log Out / Breyta )

Twitter picture

You are commenting using your Twitter account. Log Out / Breyta )

Facebook photo

You are commenting using your Facebook account. Log Out / Breyta )

Google+ photo

You are commenting using your Google+ account. Log Out / Breyta )

Tengist við %s