Elsku stelpur

Höfundur: Una Torfadóttir

(Smellið á CC til að sjá textann á myndbandinu)

Ég var tíu ára þegar ég var fyrst kölluð hóra
Þá skildi ég ekki af hverju, núna skil ég

Ég var fyrir, ég var stjórnsöm,
fór yfir mörkin og reyndi að brjóta boxið,
en ég var lítil og ég var stelpa.

Elsku stelpur,
ekki fara ykkur að voða.
Ekki taka í burtu plássið sem er frátekið af strákum,
því ef þú ert með typpi færðu einn fermeter í viðbót
ekki krefjast þess að þið séuð virtar, þið eigið minna skilið.

Klæddu þig eins og ég vil hafa þig
haltu þig í þínu horni
málaðu þig meira, málaðu þig minna
málaðu þig minni.

Klæðaburðarviðmið Samfés:
Númer eitt: Ef klæðast á kjól eða pilsi sem nær EKKI niður fyrir hné skal klæðast lituðum sokkabuxum eða leggings.

Vegna þess að leggir á fimmtán ára stelpum gefa of mikið í skyn.

Númer tvö: Varast skal að klæðast of flegnum bolum eða kjólum.

Vegna þess að húðin á fimmtán ára stelpum gefur of mikið í skyn.

Æstu þig, æstu þig, æstu þig
Þú ert umkringd af óréttlæti og ættir helst að öskra.

Róaðu þig niður, ekki hafa svona hátt
ertu ekki bara að byrja á túr?
Passaðu þig! Þú hræðir strákana í burtu,
þú talar allt of mikið.

Hættu þessu, þú veist betur
“þú hefur ekkert alltaf rétt fyrir þér”
Vertu kurteis, ekki vera vandró
ekki koma mér í óþægilega stöðu,
ekki fokking blóta!

Vertu skynsöm vertu dugleg,
tíndu upp draslið sem aðrir skilja eftir,
týndu þér.
Gleymdu hvaða máli þú skiptir,
láttu þig hverfa.

Vertu sæt, vertu sexý,
ekki fara samt yfir strikið.
Þú veist hvað gerist
ef þú sýnir aðeins of mikið.

og í guðana bænum ekki senda honum ‘myndir’
Því þú, þín brjóst, þinn líkami og allt sem þú ert
er skítugt og ljótt og bannað
og ekki til að deila með öðrum
og þú mátt ekki eiga það sjálf

Elsku feðraveldi,
veistu, þegar þú segir mér að róa mig
og halda bara kjafti,
hveturu mig áfram
til að öskra af öllu afli
þú getur ekki stoppað það sem þú veist að er að koma
þú skilur ekki erfiðið, þú ert ekki kona.

Þið horfið upp á sviðið og sjáið ekki stráka
og einhverjir hugsa “hvar er jafnréttið í þessu?”
en við viljum vita hvar er jafnréttið í öllu?
Hvar eru konur í heiminum yfir höfuð?
Það eru konur hérna, á þessu sviði, núna,
en sumir þurfa alltaf að skima eftir strákum

Við höfum barist svo lengi
fyrir ótal sjálfsögðum hlutum
að baráttan í sjálfu sér
er orðin sjálfsagður hlutur.
En við biðjum ykkur stelpur,
að halda alltaf áfram,
að gleyma ekki skiltunum
sem stóðu upp úr göngum
að gleyma aldrei konunum
sem hrópuðu í myrkri
að gleyma síst öllum stelpunum
sem voru dónar og tíkur og fyrir.

Stelpur krefjast athygli
ekki reyna að hunsa okkur.
Stelpur krefjast tækifæra
ekki reyna að hindra okkur
Stelpur krefjast virðingar
ekki reyna að stoppa okkur.
Stelpur krefjumst jafnréttis
látum ekkert stoppa okkur!

Siguratrið Skrekks 2015- Hagaskóli. Að gerð þess kom hópurinn ásamt höfundi texta. RÚV sagði frá og birti þessa frétt ásamt myndskeiði þegar borgarstjóri afhenti verðlaunin.

 

3 athugasemdir við “Elsku stelpur

  1. Ég vil koma því á framfæri á sem flestum stöðum að mér finnst þessi hópur eigi að hljóta titilinn „Kona/Konur ársins“ Skuldlaust.

  2. Bakvísun: Knúzannállinn 2015 | Knúz - femínískt vefrit

Færðu inn athugasemd

Skráðu umbeðnar upplýsingar að neðan eða smelltu á smámynd til að skrá þig inn:

WordPress.com Logo

You are commenting using your WordPress.com account. Log Out / Breyta )

Twitter picture

You are commenting using your Twitter account. Log Out / Breyta )

Facebook photo

You are commenting using your Facebook account. Log Out / Breyta )

Google+ photo

You are commenting using your Google+ account. Log Out / Breyta )

Tengist við %s